تذكره بسيطة لكم، وهي ان القطط مش بس محتاجه أكل وشرب ونظافة، لكن محتاجه تلعب - لأن ده في طبيعتها، وبكده مايتخنوش ومايجيلهمش ترهلات - ولعب القطط في الغالب بيكون معتمد على غريزة الصيد الطبيعية بتاعتها زي ما ربنا سبحانه وتعالى خلقها
حاولوا تلاعبوهم بنفسكم، هم بيحبوا لعبة الإستغماية، صحيح هيتقطع نفسكم من الجري ورا بعض - بس في ألذ من كده؟ وطبعاً من محلات ألعاب الاطفال، اشتروا لعب فرو صغيرة أو من محلات مستلزمات القطط في فئران لعب وحاجات كده بيحبوا هم طبعاً قوي لما تعلقولهم الحاجات دي في خيط وتسحبوها عالأرض - ولعبة رمي الأشياء والقط يجري وينقض عليها - وفي اختراع ممتاز بس لازم الحرص في استخدامه جداً وهو القلم الليزر - لاعبوهم بيه وهم هيتجننوا من الجري ورا الضوء الأحمر عشان يمسكوه، لكن إوعوا الضوء يجي في عينيهم مباشرةً، لأنه خطر علينا وعليهم طبعاً
القطط مخلوقات حساسة، يا ريت نفهم طبعها لأنهم زي ما بيسعدونا، محتاجين لنا إحنا كمان نسعدهم شويه
أرجو كمان ان لو حد مربي عنده قط واحد أو قطة واحدة، وبيخرج بره البيت كتير عشان شغله مثلاً، يا ريت لو يجيب للقط قطة أو العكس، لأن ده بيكسر من الاحساس بالملل والوحدة عند القطط طول اليوم وخاصة لو ولد وبنت مع بعض لأن طريقة لعب الولد والبنت مختلفه عن بعض وده بيخلق نوع من المتعة أكتر في لعبهم مع بعض غير لما يكون ولد مع ولد أو بنت مع بنت
السبت مايو 03, 2008 3:36 pm
