السلام عليكم
أنا عايزاكم تعتبروا الموضوع ده متعة أساساً، بس في تجهيزات لازم تتم قبل البدء في غسل القطاقيط
أولاً لازم نبقى عاملين حسابنا ان ممكن هدومنا تتبل ، فلازم نبقى عاملين احطياتنا من قبلها
ثانياً الفوط الخاصة بهم لازم تبقى جاهزة عشان ننشفهم بسرعة
إللي عاوزه اقوله اننا لازم نستعمل الحيلة مع القطط عشان يحبوا المياه
وده يتم عن طريق المكافآت، بمعنى شوفوا ايه أكتر شئ قططتكم بتحبه، بس مش الأكل اليومي المعتاد بتاعهم - يعني مثلاً كبده، تونة، حتة جبنة مطبوخة، شوية لبن قليلين وهكذا - كل قط على حسب مزاجه
وخللوا في كلمة معينة بتتقال دايماً أثناء اعطائكم القط للشئ ده، وليكن مثلاً كلمة "شاطر" أو حتى اسم الشئ "جبنة" مثلاً
ووقت الحمام، إلفتوا نظر القط إن الشئ ده موجود ودايماً رددوا الكلمة أثناء الحمام، وأول ما تخلصوا حمومه وتنشفوا القط، حطوا المكافأة دي قصاده وقولوا اسمها برضه
ممكن بعد الدش مباشرة يكون ملهمش مزاج ليها، وبياخدوا جنب ويلحسوا نفسهم، برضه روحوا وراهم وحطوا المكافأة دي قصادهم وقولوا اسمها
مع الوقت ان شاء الله القط لما يستحمى وتقولوا "شاطر" أو "جبنة" مثلاً هيفهم ان الاستحمام والمياة في وراهم دايماً مكافأة
جربوا وحظ سعيد
ملحوظة
خدوا بالكم ان في قطط متحبش انها تتنقع في الحوض أو طبق الغسيل وبتفضل ان الدش ينزل عليها مباشرة، في الحالة دي رشوا عليهم ميه وحطوا الشامبوا واعملوا رغوة كافية وانقعوهم لمدة ثواني بس عشان ما يتضايقوش وكملوا بالدش